МегаФон

Мәхәббәт

Күптән төсен җуйган инде,
Күптән беткән үзгәреп.
Асыл болгар егетенең
Назлап әйткән сүзләре.

Офыкларга кадәр китеп
Җәелер моңсу томан;
Болгар кызы Айбикәнең
Алсу күлмәге сыман.

Карагайлар арасыннан,
Җитәкләшеп йөгереп,
Тиен баласыдай җитез,
Болан кебек йөгерек.

Бер пар төшеп бара кебек
Иделдәге каекка.
Алар өчен безнең Идел
Күптән инде саеккан.

чыклы үләндә калган күк
Болгар читек эзләре.
Кай гасырдан төшеп калып,
Яшьлекләрен эзләвем.

…Мең елдан соң килермен күк,
Бетмәс әле үзгәреп
Назлы болгар иркәсенең
Пышылдаган сүзләре.

Асия Минhаҗева

*****

Мәхәббәтнең яше бертигез
Әллә илле, әллә ун сигез.
Хисләре уртак куллар гына
Төзи ала сөюдән нигез…

Роберт Шаймарданов

*****

Син дип тибә йөрәк

Җәһәннәмгә барып сине
Барыбер табар идем.
Синең өчен мең чибәрне
Мин кире кагар идем.
Синең күзгә караганда,
Башкаларны күрмәм дә.
Бу дөньяда синнән чибәр
Бар икәнен белмәм дә.
Күзеңне күзеңнән алмыйм,
Башка караш ник кирәк?
Читләр бик сөя, ә минем
Тик син дип тибә йөрәк.

Венер Фәттах

*****

Тик сиңа

Бик еракка, нык озакка
Ята минем юлларым.
Әле һаман саклый учым
Җылылыгын кулларың.

Тормышымның дисбесенең
Син — кадерле төймәсе.
Хисләремнең бакчасында
Иң — иң татлы хөрмәсе!

Сагынудан сәфәр көннәр
Бик озак үтә икән!
Кайчан кайтып кочаклармын
Бәгырем, сөйгән иркәм?!
Роберт Шаймарданов

*****

Мәхәббәт

Төссез генә гомер агышларым
Сиздермичә үзып барганда,
Һәр көн иртән якты кояш чыгып,
Тагын йолдыз балкып янганда,

Нидер булды минем күңелемә,
Качты йокым айлы төннәрдә.
Татлы уйлар белән үтте алар,
Хыялларым артты көннәрдә.

Матурлыгын күрдем тирә-якның,
Тәү күргәндәй булдым доньяны.
Күңелемдә булган сихри хисләр,
Газапларга салды гел җанны.

Ул бар икән, тоям җаным белән,
Хәзер яшим аның хакына.
Ул карашлар сихерләде мине,
Алыштырмам аны алтынга.

Мин бәхетле җаным тәнем белән,
Күңелемә минем гел рәхәт.
Бу газаплы, татлы хисләремнең
Бар исеме — ул бит мәхәббәт.

Мәхәббәтем минем,сагыш утым,
Килә минем синдә каласы.
Ягымлы һәм назлы караш белән,
Бер тутырып тагын карачы!

Гульфия Гизатова 

*****

Мин ышанмыйм сөюгә —
Җаным!, диеп көюгә.
Кайнар хисләргә алданып
Янгач калып күмергә.

Яратуны үлә — бетә
Мактыйлар күп җырларда.
Чынлыкта ул киресенчә,
Аптырыйбыз шуңарга…

Мәхәббәтне гомерендә
Кем генә кичермәгән!
Тик, серләре яши һаман
Беркайчан чишелмәгән.

Роберт Шаймарданов

*****

Ике йөрәк бергә кушылса

Мәхәббәт ул кайчак гарәсәттәй
Язмышларны үтә җимереп.
Җимергәннән очкан кайпылчыклар
Йөрәкләрдә кала иң элек.
Кемдер гарәсәткә каршы чыга,
Күрүчеләр: юләр, дияләр.
Әмма кайчак кыю юләргәргә
Гарәсәтләр башын ияләр.
Мәхәббәт ул гарәсәттәй көчле,
Ике йөрәк бергә кушылса.
Җимерелми язмыш, ул нык тора,
Сөю ихлас, тугры, нык булса.

Венер Фәттах

*****

Язмыш мы соң бүләк итте сине,
Мин күкләрдә хәзер очамын.
Иң зур бүләк, шушы син дер диеп,
Кайнар кочагыма кочамын…

Мәхәббәтме, әллә сөюме бу,
Әллә татлы иң зур бер хисме.
Ялгыш бер сүз әйтеп үпкәләтеп
Сине югалтырмын мин төсле…

Син бар бүген, син яшисең җирдә
Биреп миңа иң зур хисләрне.
Кайнар мәхәббәттә янам мин
Бикләп куеп шашкан йөрәкне…

Ул йөрәккә ачкыч бары синдә
Тик югалтма, язмыш юлында.
Кызыгып кына кара башкаларга
Сөям дигәннәргә алданма…

Шаулый елга, сөю елгасы
Аксын әйдә, аксын шауласын.
Чиста булсын керсез хисләрдәй,
Безнең яшьләр анда таммасын…

Ике яр без, ике тып — тын яр
Елга ага безнең уртадан.
Бер кем әле, бер кем шушы җирдә
Елгаларга чикләр куймаган…

Лилия Сәхәбиева

*****

Мәхәббәт ул гөлләр

Чарасыз мин һаман
Су сибәм гөлләргә.
Шиңсәләр әгәрдә
Ни белән түләргә?

Күз алды — корыйлар,
Кояшлы булса да.
Һаваның торышы
Бик җылы торса да…

Битараф караштан
Мәхәббәт сүрелә.
Соңлаган тәүбәдән
Чирканып күмелә.

Ул инде терелми
Алтыннар атсаң да.
Янына — Үләм!, дип
Син кереп ятсаң да…

Мәхәббәт ул — гөлләр,
Зур хисле бакчада.
Сатылмый үскәндә
Бернинди акчага!..

Роберт Шаймарданов

*****

МегаФон